Herbscht- plausch 2016

Bi wunderbarem Herbschtwätter het sich e Schaar vo ungfäär zwanzig Rhyschnoogge beschtens gluunt gegene Mittag bim Bruedeholzspital igfunde.

Strammen Schrittes het me sich denne zackig uffe unbekannte Wanderwääg durchs scheene Baselbiet gmacht. Mit Sack und Pack sinn mir via Brändelishof richtig Rynach zue und hänn drbi dr straalendblaui Himmel und die warme Sunnestraale bi diverse Plaudereie gnosse.

Nacheme bis anhin nit ganz aaspruchsloose Wääg het sich langsam e kleine Hunger und vor allem Durscht bemerkbar gmacht, do isch nadyrlig e kleini Zwüscheverkoschtig sehr willkomme. Irgendneume imene Waldstück zwüsche Rynach und Therwil sinn uns paar anderi Schnoogge zHilf ko und hänn miteme feine Apéro drfür gsorgt, dass alli wool uff sinn und parat für dr witeri Wääg.

Früsch gsterggt, mit neu bündelte Kräft und im Wüsse das es no e beschwärliche Wääg isch bis zum Ziil, hänn mir unseri Wanderig ganz gemächlich fortgsetzt.

Witer isch dr Wääg an Ettige verbi in Richtig Aesch gange. Me het gmerkt, dass au d „Septämbersunne“ no e intensivi Straalkraft het und eim guet ka zuesetze. Nach diverse kleine, aber giftige Höheaaschtiig isch denn langsam aber sicher s Ziil in Sicht gsi: dr Winzerbetriib Fonti zwüsche Aesch und Pfäffinge. Dört akoo hänn sich alli Schnoogge, erschöpft, aber sichtlich zfriide, uffe feins Nachtässe gfreut.

Vorhär het uns d Bsitzerin und Winzerin vom Betriib Monika Fonti aber no e spannendi Fiehrig durch eins vo de gröschte Räbgebiet vom Baselbiet gee.

Aaschliessend het me sichs bimene gmietlige Raclette, em einte oder andere Gleesli Wyy vo dr huuseigene Rääbe guet lo go und dr Oobe inere glatte Rundi gnosse. Nachdäm d Beiz denne irgendwenn mol ändlich het welle zumache, hänn mir uns ufe Ruckwäg gmacht und drbi dr wunderschöni klari Stärnehimmel könne beschtuune.

Schlussändlich hets denne paar einzelni drümmligi Naase no in d Rio verschlaage, zem dä letschti einigermase waarmi Daag vom Joor bimene kalte Bierli usklinge zloo.

E härzliche Dank an d Organisatoore, es isch im waarschte Sinn vom Wort e amüsante (Herbscht)-Plausch gsi.

Do findsch Foteli vom Herbschtplausch